Ano ang progesterone?
Ang progesterone ay isang hormone na ginagawa ng mga ovary at adrenal glands. Ang hormone na ito ay may mahalagang papel sa pag-regulate ng buwanang siklo ng regla at paghahanda ng kanyang katawan para sa pagbubuntis.
Kung walang fertilization at implantation ng isang embryo sa uterine lining sa panahon ng isang partikular na siklo, ang mga antas ng progesterone ay bababa at ang regla ay magaganap. Sa kabilang banda, kung matagumpay na itinanim ng isang embryo ang sarili sa lining ng matris, ang mga antas ng progesterone ay patuloy na tataas sa panahon ng pagbubuntis upang magbigay ng proteksyon sa ina at sanggol habang sila ay magkasabay lumalaki.
Ngunit ano ang mangyayari kapag ang mga antas ng progesterone ay masyadong mababa? At ano ang mga senyales at sintomas na dapat mong bantayan? Alamin Natin.
Mga sanhi ng mababang progesterone sa mga babae
Ang ilan sa mga pinakakaraniwang sanhi ng mababang antas ng progesterone ay:
- Hypothyroidism. Ito ay isang kondisyon kung saan ang thyroid gland ay hindi gumagawa at naglalabas ng sapat na mga hormone na kailangan ng katawan.
- Hyperprolactinemia. Ito ay isang kondisyon kung saan labis ang prolactin sa katawan. Nakakaapekto ito sa produksyon ng mga sex hormone tulad ng estrogen at progesterone.
- Anovulatory cycle. Ito ay isang siklo ng regla kung saan ang obulasyon, o ang paglabas ng isang egg cell mula sa ovary, ay hindi nangyayari.
Mga palatandaan at sintomas ng mababang progesterone sa mga babae
Ang mababang antas ng progesterone ay maaaring magdulot ng iba’t ibang sintomas. Hindi rin naman agad-agad na masasabi kung ang mga sintomas ay dahil sa mababang progesterone o iba pa, dahil ang mga ito ay katulad ng sa iba pang mga kondisyon.
Ang ilang mga karaniwang sintomas ng mababang antas ng progesterone sa mga kababaihan ay kinabibilangan ng:
- Hindi regular na regla
- Spotting sa pagitan ng mga regla
- Mababaw ang tulog o kahirapan sa pagtulog
- Sakit ng ulo o migraine
- Mga pagbabago sa mood, kabilang ang depresyon at pagkabalisa
- Mababa ang libido o sex drive
- Nahihirapang magbuntis o pagkabaog
- Breast tenderness
Para sa mga buntis, ang pagkakaroon ng mababang antas ng progesterone ay maaaring senyales ng ectopic pregnancy. Posible silang makaranas ng spotting at miscarriage.
Mga lunas para sa mababang antas ng progesterone
Ang angkop na lunas para sa mababang progesterone ay nakadepende sa iyong edad at kung nais mong mabuntis.
Maaaring mayroon kang mababang antas ng progesterone, ngunit hindi nakakaranas ng mga sintomas; posible rin na hindi mo kailangan ng paggamot. Ang mga nagsisikap na magbuntis ay maaaring irekomenda sa hormone therapy.
.
Ang hormone therapy ay nakakatulong na itaas ang mga antas ng progesterone at magpakapal ng uterine lining. Mas mataas ang posibilidad na magkaroon ng malusog na pagbubuntis at pagdadala hanggang full term.
Ang mga babaeng nakakaranas ng malubhang sintomas ng menopause ay maaaring irekomenda sa hormone replacement therapy (HRT) na kinabibilangan ng parehong estrogen at progesterone. Ang HRT ay tumutulong na mapawi ang mga sintomas ng menopause tulad ng vaginal dryness, hot flashes, at night sweats.
Tutulungan ka ng iyong doktor na matukoy ang pinakaangkop na opsyon batay sa iyong mga pangangailangan. Ang paggamot para sa mababang antas ng progesterone ay kinabibilangan ng:
- Progestin-only pills
- Progesterone creams
- Vaginal suppositories
Hindi angkop para sa lahat ang hormone replacement therapy, at maaari itong magdala ng ilang mga panganib para sa mga may partikular na medical histories. Iminumungkahi na kumunsulta sa iyong doktor kung sa palagay mo na mababa ang antas ng iyong progesterone.
Mga huling paalala
Ang progesterone ay isang mahalagang hormone. Maaari itong makaapekto sa iyong kalusugan at magdulot ng ilang sintomas kapag wala ito sa balanse.
Maraming mga bagay ang maaaring maging sanhi ng mababang antas ng progesterone. Kung sa tingin mo ay mababa ang progesterone mo, ang pagkonsulta sa iyong doktor ay tutulong sa iyo na matukoy ang sanhi at ang pinakamahusay na paraan upang gamutin ito.
Mga pinagmulan:
Targonskaya, A. (September 21, 2021). Low Progesterone Symptoms, Causes, and What You Can Do About It. Flo. https://flo.health/menstrual-cycle/health/symptoms-and-diseases/low-progesterone-symptoms
Gotter, A. (May 7, 2018). Low Progesterone: Complications, Causes, and More. Healthline. https://www.healthline.com/health/womens-health/low-progesterone
Ratini, M. (December 8, 2021). Low Progesterone: Normal Levels and Symptoms. MedicineNet. https://www.medicinenet.com/low_progesterone/article.htm
