ALAMIN ANG KAHIT NA ANONG BAGAY TUNGKOL SA KALUSUGANG SEKSUWAL AT REPRODUKTIBO

Ano Ang Mararanasan Mo Kung Ikaw Ay Buntis?

pregnancy, family planning, reproductive health, pregnancy

Sumasagi ba sa isip mo na baka buntis ka? Ang tanging paraan upang makasigurado ka ay sa pamamagitan ng pagkuha ng pregnancy test. Ngunit may mga maagang sintomas ang pagbubuntis na nagsisilbing palatandaan.

Ang lahat ba ng babae ay nagkakaroon ng maagang mga sintomas ng pagbubuntis?

Ang bawat babae ay naiiba. Hindi lahat ng babae ay may parehong mga sintomas o parehong sintomas mula sa isang pagbubuntis hanggang sa susunod. Gayundin, dahil ang mga unang sintomas ng pagbubuntis ay madalas na natutulad sa nararanasan mo bago at habang ikaw ay may regla, at dahil maaari rin itong idulot ng mga hindi nauugnay na mga bagay, maaaring hindi mo mamalayan na buntis ka.

Narito ang ilan sa mga pinaka-karaniwang maagang sintomas ng pagbubuntis:

Pagdurugo at kalambre

Pagkatapos magtagpo ang selyulang itlog at semilya, ang napertilisa na itlog ay dumidikit sa pader ng matris. Ito ay maaaring maging sanhi ng isa sa mga pinakaunang mga palatandaan ng pagbubuntis – pagdurugo at, kung minsan, pagkakaroon ng kalambre. Ito ay tinatawag na implantation bleeding. Ito ay nangyayari kahit saan mula anim hanggang 12 araw pagkatapos ng pagsasanib ng itlog at ng semilya.

Ang mga kalambre na nararanasan sa pagbubuntis ay kahawig ng kalambre na nararanasan kapag may regla, kaya may mga babae na napagkakamalan ito at ang pagdurugo na simula ng kanilang regla. Bukod sa pagdurugo, maaaring mapansin ng isang babae ang maputi at tila gatas na likido na lalabas sa kanyang ari. Ito ay nauugnay sa pagkapal ng mga pader ng ari ng babae, na nagsisimula pagkatapos na mapertilisa ang itlog. Ang pagdami ng mga selyula na naka-linya sa ari ng babae ay nagiging sanhi ng paglabas ng maputing likido (discharge). Ang likidong ito, na maaaring magpatuloy sa kabuuan ng pagbubuntis, ay hindi mapanganib at hindi nangangailangan ng paggamot. Ngunit kung mayroong masamang amoy na kasabay ng paglabas o mahapdi at makating sensasyon, sabihin sa iyong doktor upang masuri nila kung mayroon kang yeast o bacterial infection.

Pagbabago ng dibdib

Ang mga pagbabago sa dibdib ay isa pang maagang tanda ng pagbubuntis. Ang mga antas ng hormon ng isang babae ay mabilis na nagbabago pagkatapos mapertilisa ang itlog. Dahil sa mga pagbabago, ang kanyang mga suso ay maaaring magkaroon ng pamamaga, makalipas ang isa o dalawang linggo. O maaari itong bumigat, maging mas buo, o lumambot. Ang lugar sa paligid ng mga utong, na tinatawag na areola, ay maaari ring mangitim.

May iba pang mga bagay na maaaring maging sanhi ng mga pagbabago sa dibdib. Ngunit kung ang mga pagbabago ay maagang sintomas ng pagbubuntis, tandaan na aabutin ng ilang linggo upang masanay sa mga pagbabago sa iyong mga hormon. 

Pagkapagod o panghihina

Ang pakiramdam na sobrang pagod ay normal sa pagbubuntis. Ang isang babae ay maaaring magsimulang makaramdam ng hindi pangkaraniwang pagod isang linggo pagkatapos mapertilisa ang itlog. Bakit? Madalas itong nauugnay sa mataas na antas ng hormon na tinatawag na progesterone, kahit na ang iba pang mga bagay – tulad ng mas mababang antas ng sugar sa dugo, mas mababang presyon ng dugo, at mas malakas na paggawa ng dugo – ay lahat maaaring maka-apekto. Kung ang pagkapagod ay nauugnay sa pagbubuntis, mahalaga na makakuha ng maraming pahinga. Ang pagkain ng mga pagkaing mayaman sa protina at iron ay makakatulong sa pagkontra sa matinding pagod.

Pagduduwal (morning sickness)

Ang morning sickness ay isang tipikal na sintomas ng pagbubuntis. Ngunit hindi lahat ng buntis ay nararanasan ito. O hindi sa bawat pagbubuntis. Walang nakakaalam ng eksaktong sanhi ng morning sickness ngunit ang mga hormon na may kinalaman sa pagbubuntis ay maaaring sanhi ng sintomas na ito. Ang pagduduwal sa panahon ng pagbubuntis ay maaaring mangyari sa anumang oras ng araw bagama’t kadalasan itong nararanasan sa umaga.

Gayundin, ang ilang mga babae ay nanabik, o hindi gusto ang ilang mga pagkain o amoy kapag sila ay buntis. Ito rin ay may kaugnayan sa mga pagbabago sa iyong hormon. Ang epekto ay maaaring maging napakalakas na kahit na ang pag-iisip ng dating paboritong pagkain ay maaaring magpabaliktad ng sikmura ng isang buntis. Posible na ang pagduduwal, pagnanais, at pag-iwas sa ilang mga pagkain ay maaaring tumagal sa kabuuan ng iyong pagbubuntis. Sa kabutihang palad, ang mga sintomas ay nababawasan para sa maraming babae sa ika-13 o ika-14 na linggo ng kanilang pagbubuntis.

Samantala, siguraduhing kumain ng isang malusog na diyeta upang makuha mo at ng iyong sanggol ang mga mahahalagang sustansya. Maaari kang makipag-usap sa iyong doktor para sa payo tungkol dito.

Pagkawala ng regla

Ang pinaka-tipikal na maagang sintomas ng pagbubuntis – at nagtutulak sa karamihan ng mga babae na kumuha ng pregnancy test – ay ang naantalang regla. Ngunit hindi lahat ng mga lumagpas o naantalang regla ay dulot ng pagbubuntis. Gayundin, ang mga kababaihan ay maaaring makaranas ng pagdurugo sa panahon ng pagbubuntis. Kung ikaw ay buntis, tanungin ang iyong doktor kung ano ang dapat mong malaman tungkol sa pagdurugo. Halimbawa, kailan normal ang pagdurugo at kailan ito tanda ng isang emerhensiya?

May mga kadahilanan, bukod sa pagbubuntis, para hindi ka datnan ng regla. Maaaring nadagdagan o nawalan ka ng labis na timbang. Ang mga problema sa hormon, labis na pagod, o stress ay iba pang mga posibilidad. May ilang mga babae na hindi dinadatnan ng regla kapag tumitigil sila sa pag-inom ng kontraseptibong pildoras. Ngunit kung ang regla ay huli at ang pagbubuntis ay isang posibilidad, kumuha ng pregnancy test.

Iba pang maagang sintomas ng pagbubuntis

Ang pagbubuntis ay nagdudulot ng mga pagbabago sa balanse ng iyong mga hormon. At maaari itong maging sanhi ng iba pang mga sintomas na kinabibilangan ng: madalas na pag-ihi, pagtigas ng dumi (constipation), pabago-bagong timpla ng ugali, sakit ng ulo at sakit sa likod, pagkahilo at pagod.

Ang isang buntis ay maaaring magkaroon ng lahat ng mga sintomas na ito, o maaaring magkaroon ng isa o dalawa lamang. Kung ang alinman sa mga sintomas na ito ay nakakabahala sa iyo, makipag-usap sa iyong doktor upang mabigyan ka ng tamang payo.

Mga pinagmulan: https://americanpregnancy.org/getting-pregnant/early-pregnancy-symptoms/

https://www.mayoclinic.org/healthy-lifestyle/getting-pregnant/in-depth/symptoms-of-pregnancy/art-20043853

https://www.webmd.com/baby/guide/pregnancy-am-i-pregnant

Please follow and like us:

78 thoughts on “Ano Ang Mararanasan Mo Kung Ikaw Ay Buntis?

  1. Hello po pa help po yung huli ko pong mens ay dec 25 to 30 wala po akong mens nung jan. Tapos nakipagtalik po ako nung feb 10 una po yan tapos kinabukasan po nag spotting na po ako hanggang feb 14 kasabay po nun ang pagbigat ng pakiramdam ko sa tyan ko sobrang sakit ng puson ko tapos po para akong nahihilo na nasusuka. Anong gagawin ko po? Buntis po ba ako? O mabubuntis po ba ako irregular po ako 3 months or 2 months bago magkaroon po

  2. help me po. buong buwan ng jan hindi po ako neregla ngayon feb inaantay ko po na mg regla ako, lage laege po ako nasususka at napapagod. masakit po tyan ko bandang itaas prang mahapdi at prang lagi ako gutom kahit kakain ko lang. pro nasusuka tlga ako. possible po ba n buntis ako. pls answer me po

Mag-iwan ng Tugon

Ang iyong email address ay hindi ipa-publish. Ang mga kinakailangang mga field ay markado ng *

Modal's Close Icon