Ang kulay ng menstrual blood ay maaaring mag-iba sa panahon ng iyong cycle, mula sa bright red o pink, brown, at iba pang mga shade.

Ang iyong regla ay maaaring magsabi ng mga pahiwatig tungkol sa iyong reproductive health at pangkalahatang kalusugan.

Kaya, anu-ano ang mga kulay ng regla na maaari mong makaharap? Alamin Natin!

Ano ang maaaring makaapekto sa kulay ng iyong regla

Para sa karamihan ng mga kababaihan, ang mga regla ay karaniwang may 2-3 araw ng mabigat na daloy na sinusundan ng 2-4 na araw ng mas magaan na daloy. Ang regla ay halo ng dugo at tissue mula sa lining ng matris. Ang dami ng dugo na lumalabas ay nag-iiba, mula 4 hanggang 12 kutsara. Sa karaniwan, ito ay humigit-kumulang 30–50 mL bawat regla, ngunit hanggang 80 mL ay itinuturing na normal. Ang mga bagay tulad ng mga hormones, blood age, at impeksyon ay nakakaapekto sa kulay ng regla. Magandang malaman kung ano ang mga posibleng kulay ng dugo at kung ano ang maaaring maging kahulugan nito para sa iyong kalusugan.

Anong mga kulay ang maaari mong makaharap

Matingkad na pula

Ang reglang matingkad ang pagkapula ay nagmumungkahi na ito ay dumaloy mula sa iyong matris kamakailan lamang, na kadalasang nakikita sa simula ng iyong regla. Maaari mong mapansin ang mas matingkad na dugo kapag ikaw ay may cramps dahil ang mga cramp ay nangyayari kapag ang iyong matris ay pumipintig, na humahantong sa mas mabigat na daloy ng dugo.

Ang mabigat, matingkad na pulang daloy ng dugo ay minsan ay maaaring magpahiwatig ng mga isyu tulad ng nakunan, ectopic pregnancy, fibroids, polyp, o cancer. Kung nag-aalala ka tungkol sa iyong regla o nakakaranas ka ng mga kakaibang sintomas, kumunsulta sa isang healthcare professional para masuri at magabayan sa angkop na lunas.

Maitim na pula o kayumanggi

Ang mga kulay na ito ay nagpapahiwatig ng mas mabagal na daloy. Sa pangkalahatan, ang dugo ay may posibilidad na umitim habang ang iyong cycle ay umuusad dahil ang mas matagal na dugo mula sa mas malalalim na bahagi ng uterine lining ay mas late dumadaloy palabas.

Ang brown na dugo ay karaniwan din sa mga linggo pagkatapos ng panganganak, na kilala bilang lochia. Gayunpaman, minsan:

– Ang maitim na pula o kayumangging dugo ay maaaring magpahiwatig ng pagbubuntis.

– Ang itim na dugo ay maaaring senyales na may nakabara sa pwerta.

Kung ang mga kulay na ito ay tila hindi karaniwan para sa iyo, kumunsulta sa iyong healthcare provider.

Itim

Maaaring nakakabahala ang itim na dugo, ngunit katulad ng brown na dugo, kadalasan ito ay dugo na natagalan lang dumaloy palabas.

Ang itim na dugo ay maaari ring magpahiwatig ng pagbara sa pwerta. Mag-ingat para sa iba pang mga palatandaan tulad ng mabahong discharge, lagnat, problema sa pag-ihi, o pangangati at pamamaga sa loob o paligid ng ari. Magpatingin kaagad sa doktor kung sa tingin mo ay maaaring may nakabara sa iyong ari.

Pink

Normal para sa regla na magmukhang pink sa simula o pagtatapos ng iyong regla kapag ang daloy ay mas magaan. Nangyayari ito kapag ang discharge ay humahalo sa dugo.

Kung mapapansin mo ang kulay pink na dugo sa ibang yugto sa iyong cycle, maaaring ito ay dahil sa mga bagay tulad ng biglaang pagbaba ng timbang, hindi malusog na diyeta, o anemia. Kung sa tingin mo ay maaaring makaapekto ito sa iyong regla, magandang ideya na kumunsulta sa isang healthcare provider o isaalang-alang ang pagpapatingin sa isang nutritionist.

Orange, Gray, o Green

Maaaring maging orange ang regla kapag humahalo ang cervical fluid sa dugo, at karaniwan itong normal. Kung may napansin kang orange spotting sa labas ng iyong regla at pinaghihinalaan mo ang pagbubuntis, maaaring ito ay isang senyales ng fertilized egg implanting, na nagaganap sa paligid ng 10 hanggang 14 na araw pagkatapos ng conception.

Gayunpaman, kung ang iyong regla o discharge ay kulay orange, gray, o green, maaari itong magpahiwatig ng impeksiyon tulad ng trichomoniasis, bacterial vaginosis (BV), o ilang sexually transmitted infections (STIs). Kasama sa iba pang mga palatandaan ng impeksyon ang pangangati, masamang amoy, o masakit na pag-ihi.

Kung maranasan mo ang mga sintomas na ito, mahalagang kumunsulta sa doktor na maaaring magreseta ng mga antibiotic upang gamutin ang impeksiyon.

Mga huling paalala

Ang iyong regla ay maaaring magbigay ng ideya kung kumusta ang iyong kalusugan. Ang malusog na dalaw ay pwedeng maging kulay pula hanggang sa maitim na kayumanggi o itim. Kung ito ay orange o gray, maaari itong magpahiwatig ng impeksyon. Ang mga buntis naman na nakakaranas ng pagdurugo ay dapat kumunsulta sa doktor o Ob-Gyn para sa pagsusuri.

Mga pinagmulan:

Shkodzik, K. (April 15, 2019). Period Blood Color: A Complete Overview. Flo. https://flo.health/menstrual-cycle/health/period/period-blood-color 

Sadaty, A. (December 5, 2023). Period Blood Color. Very Well Health. https://www.verywellhealth.com/what-does-menstrual-blood-look-like-2721937 

Marcin, A. & Santos-Longhurst, A. (March 8, 2023). Period Blood Color Chart. Healthline. https://www.healthline.com/health/womens-health/period-blood