Anong Nagdudulot Ng Kakaibang Pagdurugo?
Kapag sinabing ‘spotting,’ ito ay kaunting pagdurugo mula sa pwerta kahit hindi ka pa dapat datnan ng regla. Tawag rin dito ay intermenstrual bleeding, kung saan nakakaranas ka ng spotting o pagdurugo sa pagitan ng mga regla.
Maraming nakakaranas ng intermenstrual bleeding. Hindi naman ito nakakabahala sa karamihan ng mga kaso, pero may iba na baka senyales na ito ng isang kondisyon.
Nakaranas ka na ba intermenstrual bleeding? Basahin mo kung ano ang maaaring sanhi nito.
Mga sanhi ng intermenstrual bleeding
Maraming puwedeng magdulot ng intermenstrual bleeding. Tandaan o isulat ang mga araw na napansin mo ito, pati na rin ang ibang sintomas na nararanansan mo kung mayroon man. Tutulungan ka ng iyong doktor malaman kung ano ba ang sanhi nito at papayuhan ka sa paggamot.
Hormonal Imbalance
Ang siklo ng regla ay pinamamahalaan ng dalawang hormon: ang estrogen at progesterone. Posibleng makaranas ka ng spotting kapag ang mga antas nila ay nawala sa balanse. Ilang bagay na maaaring makaapekto sa balanse ng iyong mga hormon ay:
- Dysfunctional ovaries
- Problema sa thyroid gland
- Pagumpisa o pagtigil ng pag-inom ng oral contraceptive pill (pero magbabalanse rin ito kalaunan)
Uterine fibroid
Ang mga uterine fibroid ay hindi nagdudulot ng kanser, at tumutubo ang mga ito sa loob ng matres. Karaniwang, sila ay benign at kusang lumiliit. Maliban sa intermenstrual bleeding, ang ibang sintomas ng mga fibroid ay:
- Mabigat o mahabang daloy ng regla
- Pananakit ng balakang
- Pananakit ng bandang ibabang likod
- Pananakit tuwing nagtatalik
- Problema sa pag-ihi
May ibang babae na baka walang maranasang sintomas.
Mga sexually transmitted infection
Ang mga sexually transmitted infection (STI) tulad ng chlamydia at gonorrhea ay puwedeng magsanhi ng intermenstrual bleeding o pagdurugo pagkatapos magtalik. Iba pang sintomas ng STI ay:
- Pananakit tuwing umiihi
- Puti, dilaw, o berdeng vaginal discharge
- Pangangati ng pwerta o anus
- Pananakit ng balakang
Madaling magamot at hindi magdudulot ng mga komplikasyon ang STI, basta lubos at maayos na nagamot nang maaga. Makipag-ugnay kaagad sa iyong doktor kung sa palagay mo mayroon kang STI.
Pelvic Inflammatory Disease
Puwede kang magkaroon ng pelvic inflammatory disease (PID) kung ang bakterya mula sa pwerta ay kumalat sa matres, mga fallopian tube, at obaryo. Ang pamamaga ng organong reproduktibo ay maghahantong sa pagsusugat. Iba pang sintomas ng PID maliban sa intermenstrual bleeding ay:
- Pananakit habang nagtatalik o umiihi
- Pananakit ng bandang itaas o ibaba ng puson
- Lagnat
- Labis o mabahong vaginal discharge
Makipag-ugnay kaagad sa doktor kung nakakaranas ka ng mga sintomas ng PID. maaari itong magamot at mapigilan lumala kung naagapan kaagad.
Kanser
Sa ilang kaso, may mga uri ng kanser na nagdudulot ng intermenstrual bleeding. Ito ay:
- Endometrial o uterine cancer
- Cervical cancer (kanser sa serviks)
- Ovarian cancer (kanser sa obaryo)
- Vaginal cancer (kanser sa puwerta)
Komplikasyon Sa Pagbubuntis
Maraming babae ang nakakaranas ng spotting o pagdurugo sa unang tatlong buwan ng kanilang pagbubuntis. Kaunti lang ang pagdurugo at karaniwang kulay rosas, pula, o kayumanggi.
Mga komplikasyon tulad ng pagkalaglag at ectopic pregnancy ay maaaring magsanhi sa pagdurugo habang nagbubuntis.
Kung nakakaranas ka ng pagdurugo, hindi naman ibig sabihin kaagad na komplikasyon na ito. Mabuting makipag-ugnay sa iyong doktor sa lalong madaling panahon kung nakakaranas ka ng pagdurugo habang nagbubuntis, lalo na kung marami ito at sinamahan ng pananakit ng balakang.
Kontrasepsyon
Normal lang makaranas ng intermenstrual bleeding sa unang tatlong buwan ng paggamot ng kontraseptibo gaya ng mga pill, IUD, implant, at injectable. Mawawala rin ang pagdurugo kapag nasanay na ang katawan sa kontraseptibo.
Kung madami ang pagdurugo at nararanasan mo pa rin ito lagpas tatlong buwan, mabuting kumonsulta na sa doktor ukol dito. Baka magrekumenda siya ng ibang kontraspetibo para sa iyo.
Puwede ring mangyari ang intermenstrual bleeding kapag hindi mo sinunod ang tamang paggamit o pag-inom ng kontraseptibo. Halimbawa nito ay ang kapag nakaligtaan uminom ng pill.
Obulasyon
May ibang babae na nakakaranas ng ovulation spotting sa pagitan ng kanilang regla. Nangyayari ang pagdurugo tuwing obulasyon, kung kailan nagpapakawala ng selulang itlog ang obaryo. Basahin ang higit pang impormasyon dito.
Implantation
Isa sa mga unang senyales ng pagbubuntis ay ang implantation bleeding, pero hindi lahat ng babae ay makakaranas nito. Nangyayari ito kapag ang napertilisang selulang itlog ay dumikit na sa uterine lining.
Karaniwang nangyayari ang implantation bleeding ilang araw bago mo inaasahan dumating ang iyong regla. Mas kaunti at sandali ang pagdurugo kumpara sa karaniwang regla.
Perimenopause
Ang perimenopause ay ang unang hakbang bago ang menopos. Hindi na balanse ang mga hormon sa yugtong ito. Hindi na regular ang pagregla, makakaranas na ng spotting at kakaibang pagdurugo, at may ilang buwan na maaaring hindi datnan ng regla.
Trauma
Puwede ring magdulot ng intermenstrual bleeding mula sa trauma o pinsala sa puwerta o serviks. Maaaaring galing ito sa:
- Sexual assault (rape)
- Marahas na pagtatalik
- Isang bagay, tulad ng tampon o laruang sekswal
- Isang pagsusuri o operasyon, tulad ng pelvic exam
Mga uterine o cervical polyp
Ang mga polyp ay abnormal na paglago ng tisyu sa katawan. Matatagpuan ang mga ito sa matres o serviks. Karaniwan, hindi ito nagdudulot ng kanser.
Ang mga cervical polyp ay madalas na hindi nagpapakita ng sintomas, pero maaari silang magdulot ng:
- Kaunting pagdurugo pagktapos magtalik
- Kaunting pagdurugo sa pagitan ng mga regla
- Kakaibang vaginal discharge
Sa karamihan ng mga kaso, hindi kailangan sumailalim sa paggamot, maliban na lang kung nakakaranas ng nakakabahalang sintomas. Kung inirekumenda ng doktor na alisin ang mga polyp, madali lang ito at hindi masyadong masakit.
Ang mga uterine polyp ay mas karaniwan sa mga babae na tapos na magmenopos. Ang iba makakaranas ng kaunting pagdurugo, habang ang iba naman walang sintomas.
Endometriosis
Ang endometriosis ay isang kondisyon kung saan ang uterine lining ang lumalago sa ibang parte kung saan hindi dapat. Ang iba pang sintomas ay:
- Pananakit ng balakang
- Masakit na pagregla
- Mabigat na daloy ng regla
- Pananakit habang nagtatalik
- Kahirapan magbuntis
- Pananakit tuwing umiihi o tumatae
- Pagtatae, tibi, o pagkahilo
- Panghihina
Polycystic ovary syndrome (PCOS)
Ang PCOS ay isang kondisyon kung saan ang mga obaryo o adrenal gland ay lumilikha ng labis na “panlalaking” hormon. Para sa ilang babae na may PCOS, hindi sila nireregla o iilang beses lamang sa isang taon.
Maliban sa intermenstrual bleeding, ang iba pang sintomas ng PCOS ay:
- Hindi regular na pagregla
- Pananakit ng balakang
- Pagdagdag ng timbang
- Labis na paglago ng buhok sa mga parte na hindi dapat
- Kahirapan mabuntis
- Taghiawat
Stress
Maraming paraan naaapektuhan ang iyong katawan kapag ika’y nastress. May ibang babae na nakakaranas ng intermenstrual bleeding dahil sa mataas na antas ng pisikal o emosyonal na stress.
Mga gamot
May ilang mga gamot tulad ng blood thinner, gamot para sa thyroid, at mga hormonal na gamot na nagdudulot ng intermenstrual bleeding.
Iba pang sanhi
Sa ilang bihirang kaso, ang diyabetis, liver disease, kidney disease, at pagdagdag o pagbawas sa timbang ay maaari ring magdulot ng intermenstrual bleeding.
Anong dapat gawin
Kung sa palagay mo ang nararanasan mong spotting ay sintomas ng pagbubuntis, mag-pregnancy test para malaman mo. Pero kung nakumpirma mo nang buntis ka at nakakaranas ka ng pagdurugo, ipaalam ito sa iyong doktor kaagad.
Kumonsulta sa doktor kung nakakaranas ka ng intermenstrual bleeding. Ang sanhi nito ay baka nangangailangan ng agarang atensyong medikal. Makakatulong rin sa iyong doktor malaman ang sanhi kung sinusulat mo ang mga araw na nakakaranas ka ng intermenstrual bleeding, at ang iba pang sintomas na nararamdaman mo.
Mga iba pang sintomas na dapat mong bantayan ay:
- Lagnat
- Pananakit
- Pagkahilo
- Madaling magpasa
Ang mga babaeng nakakaranas ng pagdurugo kahit na nagmenopos na sila ay dapat magpunta na sa doktor kaagad.
Kung ang intermenstrual bleeding ay nagsimula lamang mula noong unang gamit o inom mo ng kontrasepsyon, bigyan ito ng tatlo hanggang anim na buwan para masanay ang katawan. Kausapin ang doktor kung lumala o tumagal ang pagdurugo.
Paggamot at pag-iwas
Walang home remedy para sa intermenstrual bleeding. Ang tamang paggamot para sa iyo ay nakadepende sa sanhi nito, kaya napakahalagang magpasuri sa doktor.
Kung gumagamit ng kontraseptibo, gamitin ito nang tama ayon sa tagubilin at payo ng doktor. Subukan rin bawasan ang stress sa pamamagitan ng paglaan ng oras para magrelaks. Nakakabuti rin sa katawan ang mabuting pamumuhay. Mag-ehersisyo nang regular, at kumain ng masustansyang pagkain.
Maraming posibleng sanhi ng intermenstrual bleeding. May ilan na kailangan ng atensyong medikal at paggamot, pero ang iba naman ay walang kailangan ikabahala. Anumang intermenstrual bleeding ay dapat ikonsulta kaagad. Ang tanging paraan para malaman ang sanhi ay sa pamamagitan ng pagpapasuri sa doktor.
Mga pinagmulan:
https://www.healthline.com/health/vaginal-bleeding-between-periods#seek-medical-help
https://www.healthline.com/health/womens-health/spotting-before-periods
https://www.medicalnewstoday.com/articles/321811
https://www.webmd.com/women/spotting-between-periods
Feb 2 nag simula akong uminom ng pills hanggang sa umabot sa 10days n akong nainom ng pills nag karoon ng bahid o dinatnan ako ng regla after 3 to 4 days binalik ko ung pag inom ko ng pills.
May ng ari smin ng asawa ko makalipas ng ilang arw ay naging okay nmn walang dugong lumalabas skin
2 to 3 days may bahid ulit cya kaya tigil ko na pag inom ko ng pills hanggang ngaun d nko uminom .
Feb 24 eto ulit dinugo nnmn ako 😥natatakot ako ano bang ng yyri 😥sana matulungan nyo ako sa aking problema
Hi Kerche! Normal na makaranas ng kaunting pagbabago sa iyong regla lalo na sa umpisa dahil nag-a-adjust ang iyong katawan sa pills. Dapat tinuloy-tuloy mo lang ang paginom para masanay ang iyong katawan kahit niregla ka o hindi. Dahil may mga nilaktawan kang araw, hindi ka lubos na protektado ng pills at posibleng mabuntis ka.
tanong ko lang po, may iud po ako at halos 2years na po sa akin, hindi pa ko nakakapagpa pap smear since then. nagkaregla ako ng 2nd week ng feb, then nung nagmeet kmi ng husband ko after ng mens ko, wla naman dugo, 2 weeks after nagmeet ulit kmi, dinugo n po ako after. ano po kaya ung dahilan nun?
Hi Sheya! Maraming posibleng sanhi ng pagdurugo na walang kinalaman sa regla, kasama na rito ang ovulation bleeding. Ang ovulation bleeding ay spotting na maaaring maranasan tuwing ovulation, o ang panahon kung kailan nagpapakawala ng egg cell ang iyong ovary. May ibang sintomas pa po bang nararanasan? Mabuting magpunta sa obgyn kaagad para masuri kung ano sanhi nito at mapayuhan ka kung ano pwedeng solusyon.
Tanong ko lang po last jan dianne pill ang gamit ko tas biglang ng trust pill nako nung feb kaso po nagkamali po ata ako ng inom mas napaaga po ata kasi nagkaron ako ng feb 6 pero yung parang discharge na brownish po pero nag start na ako uminom nagtataka po ako mula feb 6 up to now may regla parin ako may epekto po ba sa regla ko ang biglaang pag palit ng pill
Hi Lheen! Maaaring makaranas ng kaunting pagbabago sa iyong vaginal discharge at regla dahil nag-a-adjust ang iyong katawan sa pills. Bigyan ito ng kaunting panahon pa para masanay. Ipagpatuloy lang ang pag-inom ng pills.
Nagkaperiod ako ng 17 ng hapun, natapus ng 19, ginamit ako ng mr ko 20. 21 nagpabunot po ako ng ngipin. Ginamit po ako ng mr ko 24 bakit po kaya may dugo ako nakita pagkatous nmin magtalik
Hi Jasmin! Paalala lang po na malayo ang iyong bibig sa iyong ari. Maraming posibleng sanhi ng pagdurugo pagkatapos makipagtalik. Pwedeng kondisyon, impeksyon, o kaya priksyon at kiskisan. Baka makatulong sa inyo ang paggamit ng water-based lubricant gaya ng EZ Lubricating Jelly para mabawasan ang priksyon at pagsusugat. Iwasan rin muna magtalik habang hindi pa naghihilom ang mga sugat, na dapat kusang gumaling sa loob ng ilang araw. May ibang sintomas pa po bang nararanasan? Gaano katagal ang pagdurugo? Laging siguraduhin na malinis ang ari sa pamamagitan ng paghugasan nito araw-araw, at umiwas magsuot ng masisikip na damit. Kung malakas, lumakas o kaya’y tumagal na ng ilang araw ang pagdurugo, o palagi kang nakakaranas ng pagdurugo pagkatapos magtalik, dapat nang magpunta sa obgyn upang magpasuri.
Hello po gumagamit po ako ng pills pero meron na po akong isang baby tapos po nsa pang 18 tablet palang po ako pero dinugo na po ako dalawang araw na po pero d kami ngtatalik ng asawa ko po
Hi Andrada! Normal lang na datnan o hindi datnan ng regla kapag nagpipills. Ipagpatuloy-tuloy lang ang pag-inom nito.
Hi po may tanong po ako sana po matulungan niyo ako.. Noong January nitong taon lang po..bago ako niregla dinudugo po ako nang konti tas brownish po yong kulay after 1week niregla napo ako sa mismong date nang regla ko tapos ngayong buwan po same parin dinudugo parin po ako konti lng din tas brownish parin kulay tas 9days late napo Hindi parin ako dinatnan nang regla ko same parin yong lumalabas dinudugo parin ako nang konti lang din.
Hi Beverlyn! Maraming pwedeng magdulot ng mga pagbabago sa regla, at kasama rito ang ilang mga impeksyon, sakit, stress, diyeta, at biglaang pagbabago ng timbang. May ibang sintomas pa bang nararanasan? Mabuting magpunta sa obgyn para magpasuri kung ano ang sanhi at mapayuhan ka kung ano pwedeng solusyon para dito.
Hello po. Ask ko lng po nagregla po ako nung jan. 25 natapos nung mga 30-31 po then after 1 week bgla pong may dugo sa panty q. Hindi naman gaano kadami pakunti kunti pong lumalabas madalas pong buo. Until now may paunti unting dugo p rn pong lumalabas. Anu po kaya ibig sabihin nun? 1st time lng po kasi mangyari sken eto. Natatakot naman ako pumnta magpacheck up. Kaya nagreresearch nalang po ako kng bakit may dugong lumalabas sken kahit tapos n q magregla.
Hi Jesica! Maraming posibleng sanhi ng pagdurugo na walang kinalaman sa regla, kasama na rito ang ovulation bleeding. Ang ovulation bleeding ay spotting na maaaring maranasan tuwing ovulation, o ang panahon kung kailan nagpapakawala ng egg cell ang iyong ovary. May ibang sintomas pa po bang nararanasan? Mabuting magpunta sa obgyn kaagad para masuri kung ano sanhi nito at mapayuhan ka kung ano pwedeng solusyon.